أهالي الشرقية للسيسي: تحية زي الزفت على دماغك

- ‎فيأخبار

..وعلى دماغ كل واحد مسئول في البلد

أرسل عدد من الأهالي بمركز ههيا بالشرقية رسالة لقائد الانقلاب العسكري على موقع التواصل الاجتماعي فيس بوك، مستنكرين إزالة المحلات التي يملكونها وتعتبر مصدر الرزق الوحيد لهم بالمدينة.

واستنكر الأهالي قيام عضو برلمان العسكر بالمدينة اللواء عصام أبوالمجد بالوقوف خلف هذه الإزالات لمصلحته الشخصية والخاصة وفيما يلي نص الرسالة:
السيد عبدالفتاح السيسي الراعي الرسمي للفساد والمفسدين في مصر

تحية زي الزفت على دماغك وعلى دماغ كل واحد مسئول في البلد دي لم يعمل للصالح العام ومصلحة المواطن الكادح الحريص على أكل لقمة عيشه من حلال.

عايزيين نفهم من سعادتك.. البلد دي هتفضل ماشية بالكوسة والمصلحة الشخصية لحد امتي وهتفضلوا لحد امتي في حالة إرهاب وتخويف للشعب الغلبان وأخذ حقه منه بالقوة المفرطة.. واللي يعترض يلقي مصير لا يعلمه إلا الله علشان ملوش ضهر في البلد دي.

عايزيين نعرف برضوا حق الناس اللي تم إزالة أماكن أكل عيشهم بعد أن تم شراؤها من قبل الدولة قبل ذلك، وبعد أن تم صرف كل ما يمتلكون من أموال على هذه المحال لكي يقتاتوا منها هم وأسرهم عايزيين نعرف إزاي الدولة تبيع وبعدين ترجع تغتصب حق الناس بالقوة، وإذا تم التعرض لها يتهم الشعب الغلبان بالإرهاب ومن الممكن أن يقتل أو يسجن ويضيع مستقبل أسر بأكملها علشان نرضي بعض المسئولين في الدولة.. وعلى رأسهم النائب الذي قامت الدائرة بانتخابه ليدافع عن حقوقها وليس لاغتصاب حقوقهم لتحقيق بعض المصالح الشخصية على حساب المواطن الغلبان.

عايزيين نعرف هنفضل لحد امتى نهدر في المال العام.. طبعا في واحد غبي ممكن يسيب الكلام كله ويقولك هو فين المال العام اللي بيهدر.. هقوله ماهو اللي من عينة حضرتك دايما باصص تحت رجليه وميعرفش يرفع راسه لأنه شايف انه ملوش كرامة ودايما بيتساق زي الغنم.. ومبيعرفش يفكر.. وأحب أقوله إن المال العام هيهدر لما تكلف الدولة ما لا تتطيق لعمل مشروع ضرره أكبر من نفعه.. وممكن يتشال تاني في أي وقت.. واللي هو المزلقان المزعم إقامته مكان المحال التي أزيلت من أماكنها.

وطبعا في هناك قطيع من البشر أصحاب المصالح الشخصية برضوا هيقلبوا الموضوع أنها كانت حربا بين السيد اللواء المبجل وبعض الأشخاص المحترمة في البلد التي لا تريد أي منفعة ولا يهمها أي شيء غير الصالح العام.. وبعدين اللواء كسب لأنهم كدابين زفه وتنابلة سلطان.

وسؤالي هنا.. قبل ما أنهي كلامي لكل من شارك في هذه المصيبة النكراء.. الناس دي حقها هيروح فين؟ والفلوس اللي اشتروا بيها هتروح فين؟ ويا ترى هتتعوض عنها ولا لأ؟

وفي نهاية الكلام.. أتقدم أنا المواطن ابن ههيا أحمد إسماعيل بخالص التعازي والمواساة لكل أصحاب المحال التي تم الاعتداء عليها من قبل الفسدة والمسئولين عديمي الضمير، وأدعو الله العلي القدير بأن يعوضهم خيرا في مصيبتهم ويخلفهم خيرا منها.. وحسبنا الله ونعم الوكيل.